文章分類: 2006 德國世界盃 (如履薄冰)

冠軍戰

felineterry — Mon, 10 Jul 2006 21:49:03 +0800

意大利對法國 -- 十二碼 6:4 (1:1)
意大利與法國激戰 120 分鐘亦分唔倒勝負, 最後要以互射十二碼黎決定冠軍. 十二碼結果意大利五位球員入晒, 而法國有查斯古特中門楣彈出唔入, 所以意大利以十二碼比數 5:3, 即總比數 6:4 擊敗法國, 第 4 次奪得世界盃冠軍.
今場波雙方互有攻守, 上半場法國既馬隆達搏得十二碼, 由施丹操刀勁射, 個波中楣底彈入, 法國領先 1:0. 19 分鐘, 馬達拉斯接應派路開出角球一頂入網, 追平 1:1. 35 分鐘, 東尼又係接應派路開出角球一頂, 可惜皮球中楣彈出, 未能為意大利反超前.
下半場法國漸漸控制戰局, 但意大利亦有兩個具威脅攻勢, 包括派路既罰球僅僅柱邊出界, 以及東尼接應開出罰球頂入龍門, 但由於當時東尼係企晌越位位置, 所以入球被判無效. 及後雙方成膠著狀態.
加時時段, 施丹表演其頂上功夫. 103 分鐘, 施丹接應隊友傳球一頂, 保方反應夠快, 一手叉出龍門後面. 110 分鐘, 施丹再次表演其鐵頭功, 可惜今次係頂人個肺, 而唔係頂波. 因為抵不住馬達拉斯既挑釁, 施丹一頭頂向後者而換黎直接紅牌出場, 令其告別戰蒙上污點.

聽講話馬達拉斯講左句："你是意大利養出來的一條忘恩負義的狗", 辣著左當時右手有小小傷既施丹. 可能因為依句, 同晌意大利搵食既查斯古特十二碼先唔入, 因為佢要感恩~

2006 德國世界盃曲終人散, 各獎項亦名花有主：
冠軍 -- 意大利
亞軍 -- 法國
季軍 -- 德國
公平競技獎 -- 巴西 & 西班牙 (都好, 愛隊拎返個安慰獎)
金球獎 -- 施丹 (2012 票, 簡拿華路 1977 票, 派路 715 票)
金靴獎 -- 高路斯 (5 球)

季軍戰

felineterry — Sun, 09 Jul 2006 17:05:36 +0800

德國對葡萄牙 -- 3:1
雙方上半場 0:0. 下半場舒韋恩史迪加一個遠射, 葡萄牙門將列卡度因為失左位, 個波晌佢手邊入網, 德國領先 1:0. 及後舒韋恩史迪加斬罰球, 葡萄牙後衛比堤擺烏龍, 德國領先 2:0. 78 分鐘舒韋恩史迪加一個勁靚遠射, 個波網仔入, 德國贏到 3:0. 臨完場費高右路傳中, 紐奴高美斯插水式頂入破蛋. 最後德國以比數 3:1 得到季軍. 而費高亦係最後一次代表葡萄牙國家隊比賽.

四強賽事

felineterry — Wed, 05 Jul 2006 22:15:02 +0800

德國對意大利 -- 加時 0:2 (0:0)
加時下半場臨完場兩分鐘, 意大利既派路接應開出角球, no-look-pass 妙傳格羅素, 後者第一時間燙射, 網仔入, 意大利領先 1:0, 之後德國全軍反撲令後防空虛, 基拿甸奴帶波殺入禁區, 又黎一個 no-look-pass 比後上既迪比亞路, 後者再入一球, 處死了德國隊, 意大利晉身決賽.

葡萄牙對法國 -- 0:1
亨利晌上半場 33 分鐘被卡華奴勾跌, 法國得十二碼, 由施丹操刀射入. 下半場葡萄牙得一罰球, C 朗射左個好易接既波, 巴夫斯竟然以排球手將佢托高左, 但係後上既費高頭槌頂高左, 依球必入波入唔倒, 注定葡萄牙唔可以再進一步. 法國晉身決賽, 將會同意大利爭冠軍.

八強第二日賽事

felineterry — Sun, 02 Jul 2006 11:44:36 +0800

英格蘭對葡萄牙 -- 十二碼 1:3 (0:0)
救世主朗尼變罪人, 因為推 C 朗被直接紅牌趕出場. 結果雙方激戰 120 mins 兩無紀錄要互射十二碼定勝負. 五輪十二碼英格蘭有林柏特, 謝拉特 & 加歷查唔入, 而葡萄牙只有兩個球員唔入. 結果葡萄牙以總比數 3:1 淘汰英格蘭殺入四強.

巴西對法國 -- 0:1
亨利晌下半場一箭定江山, 氣走巴西晉級四強, 將會與葡萄牙爭入決賽.

八強第一日賽事

felineterry — Sun, 02 Jul 2006 00:51:19 +0800

德國對阿根廷 -- 十二碼 5:3 (1:1)
兩隊都踢得好小心, 所以場波好悶!! 下半場艾耶拉接應列基美開出角球頂入領先一球. 之後阿根廷換出列基美 & 基斯普, 而龍門受傷又換埋龍門. 而德國高路斯晌較後時間接應隊友普多斯基頭槌二傳, 楔靚位頂入追平. 之後戰況成膠著狀態, 要以互射十二碼分勝負. 德國全部入晒, 而阿根廷既艾耶拉 & 甘比亞素所射被列文撲出, 結果德國以十二碼氣走阿根廷入四強.

意大利對烏克蘭 -- 3:0
意大利今場打進攻足球, 以 3:0 輕取烏克蘭晉身四強, 將會對東道主德國.

十六強第四日賽事

felineterry — Wed, 28 Jun 2006 00:56:08 +0800

巴西對加納 -- 3:0
開波初段, 肥哨扭過龍門射入空門, 巴西領先 1:0. 上半場尾段, 加納球員死扭唔肯交波, 個波比巴西偷左 (抵死), 巴西打個快速反擊, 由阿祖安奴接應隊友傳球射入成 2:0. 依球波阿祖安奴好似係越位, 同埋又好似係加納球員擺烏龍. 下半場加納球員積極反撲, 好多靚組織同入楔, 但係最後一係射出界, 一係比龍門沒收. 及後加納既基恩因為晌禁區入面插水, 拎第二張黃牌被逐, 形勢逆轉. 最後巴西既薛羅拔圖突破越位, 挑過加納門將, 輕鬆地射入空門埋齋, 巴西輕取加納 3:0 晉級八強.

西班牙對法國 -- 1:3
很傷心!! 愛隊輸波出局!!
賽前見魯爾打正選就心知不妙, 果然成隊踢到沈晒, 魯爾 & 阿朗素踢到冇晒影, 其他都好唔得幾多, 法比加斯似乎後備好過正選.
其實西班牙有個好開始, 上半場打左一半左右, 杜林晌禁區撞跌柏保路, 西班牙得十二碼, 由韋拿射入領先 1:0. 但係依個好開始唔係維持好耐, 上半場尾段韋拉妙傳後上既列貝利，後者長驅直進, 推過卡斯拿斯, 射入空門替法國追平 1:1.
下半場西班牙先後以祖亞昆換韋拿, 路爾斯卡西亞換魯爾. 魯爾換出即刻活力大增, 起碼造倒波先啦. 但係今杖法國中後防真係打得好好, 冇乜甩漏. 之後辛拿換沙維, 依個調動勁奇怪, 阿朗素踢到冇影又唔換走反而換走沙維. 到下半場尾段, 法國晌禁區外得罰球, 施丹斬波, 阿朗素頭搥發波瘟頂後, 韋拉遠柱一頂省中沙治奧拉莫斯入網, 法國反勝 2:1. 阿朗素成事不足敗事有餘. 及後西班牙傾全力反撲, 後防空虛. 晌補時階段法國晌中場偷倒個波做一個快速反擊, 當時三個打兩個, 施丹接應韋托特第一時間妙傳突破越位, 禁區內並扣過佩奧爾, 射個地波入網, 法國最後贏 3:1 晉級八強, 將會對巴西.
唉...... 廿幾場不敗既西班牙一輸就出局. 西班牙分組賽去得太盡, 首名出線就算過左法國, 八強都會遇巴西. 同埋似乎實力見底, 比對手睇通晒, 希望將來打得好 d 啦.

十六強第三日賽事

felineterry — Tue, 27 Jun 2006 01:28:04 +0800

意大利對澳洲 -- 1:0
依場又係悶波. 意大利下半場打少個開始龜縮, 澳洲又把握唔倒依個有利形勢, 所射既波一係浪射, 一係冇力比龍門沒收. 意大利晌補時階段, 格羅素帶波由左邊切入, 被尼爾剷球之下插水搏倒十二碼, 由托迪射入, 之後球証隨即吹長雞完場, 澳洲冇仇報, 飲恨地被淘汰. 意大利晌極之"符碌"之下晉級八強.

瑞士對烏克蘭 -- 十二碼 0:3 (0:0)
兩隊各有一個中楣中柱波, 雙方都冇辦法晌 120 分鐘之內將皮球射入對方龍門, 結果要以互射十二碼定勝負. 烏克蘭只有舒夫真高唔入, 之後三輪入晒, 而瑞士頭三輪十二碼都唔入, 結果烏克蘭以十二碼比數 3:0 淘汰瑞士晉級八強, 將會對"符碌之神"意大利. 瑞士晌決賽周所有比賽保持 0 失球, 實在非常難得!!

十六強第二日賽事

felineterry — Mon, 26 Jun 2006 22:26:11 +0800

英格蘭對厄瓜多爾 -- 1:0
開波初段, 泰利有一個失誤, 將個波頂後, 比厄瓜多爾球員偷左, 後者抽射比艾殊尼高爾掂倒再中門楣彈出. 下半場碧咸一個招牌罰球一箭定江山, 英格蘭晉身八強. 其實碧咸次次都係射死某個方向, 點解龍門唔企過小小呢? 果球真係爭小小就救倒架!!

葡萄牙對荷蘭 -- 1:0
上半場葡萄牙憑 C 朗, 迪高 & 文尼治三人既小組組織同入楔, 撕破左荷蘭既防線, 由文尼治射入全場唯一入球. 今場波好多紅黃牌, 黃牌比數係 9:7, 同埋雙方各有兩個球員被逐, 全部都係兩黃變一紅. 葡萄牙晉級八強, 將會對英格蘭.

十六強第一日賽事

felineterry — Sun, 25 Jun 2006 14:55:19 +0800

德國對瑞典 -- 2:0
瑞典好屎, 後防鬆散, 冇人去拍波, 比德國話射就射. 德國晌開波早段已經贏緊兩球, 而瑞典上半場仲打少個. 下半場拿臣搏倒十二碼, 但係佢炒飛機, 浪費左個機會. 結果德國保持戰果到完場, 晉級八強.

阿根廷對墨西哥 -- 加時 2:1 (1:1)
開頭以為阿根廷會穩勝, 原來係有得打. 墨西哥以快打慢, 控制住比賽節制, 令阿根廷處於下風. 墨西哥既馬昆斯接應角球楔個靚位剷入領先 1:0. 其後阿根廷開角球, 波迪格比基斯普壓住攏烏龍頂入自己龍門, 阿根廷追平 1:1. 比賽成膠著狀態. 到比賽尾段阿根廷食左個炸糊, 但係睇返慢鏡原來係誤判. 加時上半場, 麥斯洛迪古斯接應隊友高波, 一控一個窩利世界波射入死角, 反超前 2:1. 可能係墨西哥之前打得太快, 後勁不繼, 所以落後之後球員想追都有心冇力. 其實對阿根廷係要咁打, 只不過係估唔倒會比球咁靚既世界波收死左遮. 結果阿根廷苦戰獲勝, 晌八強將會對德國.

小插曲：我晌朝早諗住上網買德國贏 x 阿墨開大, 點知馬會唔比我下注. 嘿嘿, 真好, 依家慳返 $10~~

分組賽 3rd rd -- G 組

felineterry — Sun, 25 Jun 2006 14:40:09 +0800

瑞士對南韓 -- 2:0
瑞士不敗可以出線, 南韓要贏波先得, 或者和波而法國贏唔倒兩球或以上. 結果南韓輸比瑞士出局, 瑞士首名出線, 十六強對 H 組次名, 即係烏克蘭.

多哥對法國 -- 0:2
法國形勢清晰, 只要贏兩球或以上就可以晉級十六強. 結果法國奪得小組次名, 將會對之前已穩奪 H 組首名既西班牙. 期望愛隊下場踢法國出局!!

分組賽 3rd rd -- H 組

felineterry — Sat, 24 Jun 2006 00:19:31 +0800

沙特阿拉伯對西班牙 -- 0:1
因為已經出左線, 所以今場西班牙只派出二隊上陣. 今場波有幾個西班牙仔幾搶鏡：雷耶斯, 法比加斯 & 恩尼斯達, 前者好快, 盤過晒 d 對手後衛, 而後者勁比直線. 唯一入球係由雷耶斯斬罰波入禁區, 桑尼圖頂入. 魯爾仍然踢得好沈, 下半場比韋拿代替其位置. 之後仲有托利斯同沙維入替, 不過冇大作為. 臨尾沙特阿拉伯發難, 差 d 追平. 西班牙三戰全勝, 入 8 球失 1 球, 十六強將會對 G 組次名.

烏克蘭對突尼西亞 -- 1:0
憑藉舒夫真高既十二碼入球, 令一定要贏既突尼西亞晉級希望幻滅. 烏克蘭三戰兩勝一負, 以小組次名晉級十六強, 將會對 G 組首名.

分組賽 3rd rd -- F 組

felineterry — Sat, 24 Jun 2006 00:04:02 +0800

克羅地亞對澳洲 -- 2:2
克羅地亞贏就出線, 澳洲唔輸就得了. 基維爾既一個救命入波追平, 踢左克羅地亞出局. 澳洲以次名出線, 將會對 E 組首名, 即係意大利. 比賽中途有個小插曲, 克羅地亞球員施蒙歷拎左三張黃牌先至比人趕出場, 咁既球証真係......

日本對巴西 -- 1:4
日本仔冇得諗, 一定要大勝對手, 仲要澳洲唔贏, 先可以以得失球壓過克羅地亞同澳洲出線. 日本仔有個好開始, 領先過 1:0, 但係肥哨突然發威入波追平. 下半場巴西再入多三球, last 一球又係肥哨, 日本宣佈出局. 巴西三戰全勝以小組首名出線, 將會對 E 組次名, 即係加納.

分組賽 3rd rd -- E 組

felineterry — Fri, 23 Jun 2006 22:55:03 +0800

捷克對意大利 -- 0:2
場波其實好悶, 捷克冇前鋒, 所以埋親門都只係驚險鏡頭. 上半場比意大利領先一球, 下半場打少個, 執定包袱返屋企了. 臨完場恩沙基扭過施治埋齋, 意大利全取三分, 二勝一和以小組首名出線, 將會對 F 組次名.

加納對美國 -- 2:1
加納贏左美國, 另一方面捷克輸波, 所以加納成為小組次名, 十六強將會對 F 組首名.

分組賽 3rd rd -- C 組

felineterry — Thu, 22 Jun 2006 21:45:18 +0800

科特迪瓦對塞黑 -- 3:2
塞黑上半場領先 2:1, 下半場打少個, 之後比科特迪瓦入兩球反勝, 結果做左第二支三零部隊. 塞黑外圍賽只失一球, 仲迫到西班牙要踢附加賽, 但係佢晌決賽周走晒樣, 三場失十球. 贏波既科特迪瓦同塞黑齊齊出局.

荷蘭對阿根廷 -- 0:0
一場超級悶波, 今場只屬名次之爭, 所以兩隊都半力上陣. 和左波之後, 阿根廷仍然靠較佳既得失球成績成為小組首名, 將會對 D 組次名, 即係墨西哥. 而荷蘭則成為 C 組次名, 將會對 D 組首名, 即係葡萄牙.

分組賽 3rd rd -- D 組

felineterry — Thu, 22 Jun 2006 21:29:33 +0800

伊朗對安哥拉 -- 1:1
安哥拉要淨勝若干球, 同埋要墨西哥輸先可以晉級, 依家和左, 所以同伊朗齊齊執包袱了.

葡萄牙對墨西哥 -- 2:1
依場波好悶. 馬昆斯晌禁區裡面特登用手拍波, 結果輸十二碼. 葡萄牙贏埋依場三戰全勝, 奪得小組首名, 十六強將會對 C 組次名. 雖然墨西哥輸波, 但係另一面安哥拉唔能夠贏波, 所以佢仍然可以以小組次名出線, 將會對 C 組首名.