文章分類: 粗框 (如履薄冰)

比粗框串, 勁灰!! T_T

felineterry — Thu, 15 Jun 2006 21:39:03 +0800

近排經常碰見, 每次都有打招呼, 算係咁啦. 依個禮拜都唔見佢帶眼鏡.
今日放工同佢一齊落樓, 仲有打耙仔一齊.
我同佢講話："你有 email 喇喎."
佢話："係呀, 終於有喇."
隔左一陣我再講："不如我得閒 send 野比你丫."
之後就比佢串："乜你好得閒咩!?"
唉~~ 其實所謂"得閒"只係口頭禪, 唔駛咁認真囉.
我之後話："你好忙?"
佢答："係呀, 做到冇停手."
然後到地下, 我同左佢講拜拜, 之後走左了. 唉, 最慘係打耙仔在場, 聽到佢串我, 以佢既仆街性格唔暗笑我 & 唱我!!?? 或者粗框唔係真係串我, 只係有果句講果句, 但係衰在比打耙仔聽到, 又以為我衰左, 沾沾自喜.
d 打耙仔就係咁仆街, 但係個天又睇住佢, 努力有回報, 你話世界上係咪真係天有眼呢? 我越來越唔覺得囉!!

仲要捱幾耐!?

felineterry — Mon, 05 Jun 2006 21:55:03 +0800

好辛苦!! 唔好再係咁樣好唔好!!??
講緊既係, 每當同一個異性越接觸得多, 距離不會拉近, 反而越來越遠!!

今日同粗框好有緣, 總共碰見佢四次. 第一次我特登經過佢果邊, 仲特登同佢打招呼, 但係佢好似唔多想理我咁, 只係係咁意應一應我, 唉..... 心傷!! 第二次果 toilet 門口碰見, 我窒左一窒, 佢問我係咪比佢嚇親, 我答佢："唔係啦~~!! XD" 第三次晌樓上 office 碰見, 佢出 lift 我入 lift, 匆匆忙忙咁打左個招呼而已. 第四次我準備走, 佢走左黎搵人, 但係似乎見唔倒佢想搵既人, 佢好似見到我望佢, 但係佢冇理會我......

近幾年, 好似個個異性都對我敬而遠之, 但係我已經做到好普通好平常心咁同對方來往, 但係都係"係女就避我", 我既異性緣係咪真係差成咁?? 運氣真係差成咁??

我自問條件唔差囉, 青靚白淨, 有穩定職業, 又擁有物業 (冇同人講), 對人又唔差 (除非對方對我唔好), 係個人靜 d 冷 d 而已. 不過我只係慢熱, 熟左我會好多野講的, 但係個個異性都冇比機會我就將我槍決囉!!

我依家好灰!! 我想要多 d 異性緣, 想要多 d 桃花運呀!!

知道叫咩名喇!!

felineterry — Fri, 02 Jun 2006 23:25:01 +0800

尋日去 toliet 見佢出緊黎, 我特登唔入去住, 等埋佢同佢傾計. 佢問我做咩唔入去, 我心諗：我入左去就要再等另一個機會識你, 當然唔肯啦!! 就咁樣知道左佢叫咩名 lu~~
想 send 個 email 比佢撩佢傾計, 點知冇佢個 email 既!? print 埋個最 update 既 ext-list 都冇, 佢岩岩走左過黎, 咪捉住佢問佢囉. 原來佢冇 phone ext & email 的, 下!!?? 佢都做左幾耐下, 都仲未有, 有點兒那個囉. 傾左幾句之後, 佢要返去, 臨走仲同我講拜拜, 我開心死啊!!
不過我見到佢同兩個男同事去食飯, 依個唔係大問題, 最大問題係見到佢同人傾電話, 仲傾得好開心, 非常擔心係有男朋友囉!!

今日我都有見到佢, 不過佢冇望我了, 很失望!!
我臨走果陣特登經過佢附近, 不過唔見佢, 我仲以為佢一早走左. 點知隔左陣又見返佢, 原來仲未走既. anyway 今日都係冇同佢打過招呼 or 眼神交流......

一點頭一微笑, 我心甜了~

felineterry — Tue, 30 May 2006 11:51:54 +0800

腦海裡不斷浮現粗框的樣子, 不斷咁夢想著可以同佢一齊既開心情況. 我就係咁架喇, 連名都未知叫咩就晌度發白日夢. 我依家好驚, 擔心希望越大失望越大, 以我依家既極度低落心情, 唔知再能唔能夠接受得到!!

依兩日我特登去多 d toilet, 希望可以碰得到粗框, 之後我會嘗試去識佢, 打開話題. 但係冇乜運, 碰唔倒. 只係今日佢走過黎比野同事, 我有幸見到佢可以同佢點下頭笑下, 但係一個點頭一個微笑, 亦令我甜在心頭~~ 頭先放工臨走時想借 d 意走過去, 不過見到有同事晌佢個位度, 同埋佢亦好似放左工 -- 希望唔係去左拍拖啦!!

好想同粗框一齊, 好想好想能夠做佢男朋友!!

情迷粗框

felineterry — Fri, 26 May 2006 23:35:28 +0800

原來粗框果日只係請假, 我仲以為佢無聲無色咁走左, 比佢嚇死了~~
依兩日我有同佢打招呼 & 笑, 感覺到佢都好似有留意我咁, 如果係真既話就實在太美好了!! 希望下星期可以問倒佢叫咩名, 識佢 & 可以同佢傾計~~
尋日見到佢同個男同事好好傾, 唉!! 好驚, 近水樓台呀!! 當然我亦擔心佢有男朋友, 因為佢質素其實係唔差的. 今日佢冇戴眼鏡返工, 可能係放工之後會去街, 會唔會係拍拖呢!? 嗚~~~~ 越諗越驚!! 越諗越灰!!
粗框令我著迷, 我好掛住佢添!!

唔開心..... 唔見左佢.....

felineterry — Wed, 24 May 2006 21:55:53 +0800

佢..... 其實我並唔認識.
佢係第二個 dept. 既同事, 戴粗框眼鏡, 就稱佢為"粗框"吧, 樣子唔算得上係靚女, 不過望上去幾舒服. 我對佢有種一見如故既感覺. 我好少主動同陌生女性打招呼, 但係我幾日前忍唔住同佢打左, 唔知點解我好想識佢.
近年來經濟好返好多, 所以公司走左好多人, 尤其是粗框既 dept., 好似走馬燈咁, 走左就黎新人, 新人唔到幾個月又走, 不知換左幾多個. 粗框係新人, 黎左大約一個月左右, 我今日唔見佢返工, 所以好驚好唔開心.
我其實諗住同佢打多幾次招呼之後, 就會去自我介紹, 去認識佢. 我唔知佢想唔想同我做朋友啦, anyway 我都要去行出第一步先. 但係..... 今日佢冇返, 唔知佢係走左定係只係請假.
唉..... 希望粗框只係請假啦, 佢要走都等我地認識左先走囉!!